Job 3
Jop aga idago aga ame nani sogoba sębę po wali
1Te nogo a naga olama, me badu nogo si sogo bidama silibo si, te Jop agai pedauwali pania sabo silama, tama po weyu, te aga idago aga ame nani sogoba dwai po wali. 2Agai te po wali,3“Te Godigo ena idago haligade elalubadi yaide,
teda tama doligi sogo da, usu igi dao.
Tama ena idago ena ame nani sogo me
tama doligi sogo da, usu igi dao.
4Mu, te Godigo dwagi yai mu elama,
te sogo hulide me hulia sai me elalugi sogo da,
usu mu igi dao.
Ma, te giliga nanomai ebo tagaligi sogo da, usu igi dao.
5Te mu tama, Godigo te ena ame nani sogo mu
gegeda pigi sogo da, usu igi dao.
Mu da, agai ena ame nani sogo mu hulialugi sogo,
tama sisi pǫgo te sogo dagalude hulia selama,
te giliga palialugi sogo da, usu igi dao.
6Tama eno homugo te mu usu mu igi dao,
te eno idago haliga elalubadi,
dagalu te sisi pǫgo mu huli dąų walalugi da.
Ma, Godigo me bidi dabego te sogo
te kalenda daide sela sągi sogo da,
teda te bidi dabego te sogo nedigi menigi dao.
7Ma, te sogo hulide te dwagi yai homu meni yai sogo
tama we sibigo wai haliga isąwai sogo.
8Ma, te pobi bidi dabe, te bulu hasa
Leviatan guni tubo bage, augwaligo pobi weyu,
te ena ame nani sogo te aiyaba
elalugi sogo da, usu igi da.
9Te ma te usu igi dao, te huli sesabi igi sogo da,
tama kigamu te dagalude hǫ dabe
te ula igi menigi sogo da,
teda te be posa pigi menio.
10Mu tama, te mu tama te sogo huli
sesabi igi sogo, teda doligi dao.
Magi baso meni, agai ena homu meniama iyu yaide,
te idago haliga dąų wagi sogo da.
Tisąma yaligo da, ena megi ena sęgę me, dene me,
eno tigide hauwa mu te sabo yabao,” wali.
11“Magi baso ena ena idago haligade isisąma yaliwe?
Ma, te ena ame nani sogo tama tisąma yaliwe?
12Magi baso idago ena agai teleba munama,
magi baso ame maniwe?
13Ma, ena isigi sogo da, teda ena pila muyu,
hodo bugagia doloyu, pila mugi dao.
14Teda ena te king dabe ma king dabego koneai
bidi dabe yali gilama tama bidigi dao.
Augwali polo isilama, tama augwa
hodo doloyu, bugagia bidibao.
Augwaligo moni hanu dolai goli ma hodolai dao.
Tama tiali goli, augwali me polo isilama,
bugagia bidiyu hodo dolobao.
15Tama tialima, ena me augwali dali
bugagia pila mugi da,
te genuai bidi dabego te silva dali,
gol dali si augwa bede pągąnani,
tama te bage augwali polo isai dao.
16Magi baso ena ena idago haligade isisąma yaliwe?
Magi baso eno te giliga ula susiąma ebadi,
eno idago haligade isilama pubalobewe?”
17“Ma, te bidi polo isai bidi dabego
bulude da, megi te dwai kolesaga yali bidigo ma ebeo.
Tama bidi dabe augwa tigi te dene yali sę yali bage
isama, tama megi augwali toma tuyu bidibao
18Tama te bulude te bidi polobadu kalabus
sę yali bage, megi da augwali dua bidibao.
Augwaligo megi augwa tonalubo
sesenani bidi dabego po wabo me odobo meni.
19Te bulude da, te tobage bidi dabe te bidibo,
tagala augwali genuai nogi elalubaso,
me olo bidi yaibaso me.
Te olo sę ebo bidi dabe augwali augwa
genuai bidi dologode me bidibeo.
Mu meni, augwali megi da hala palali,”
Jopgo te po wali. a
20“Godigo te bidi dabe augwali dene dali
sęgę siyu ebo agai subo dao.
Magi baso agai augwa bidibo ula me
elalubo sula tagalobo dawe?
21Te bidi augwali isabo naga augwaligo wei mu ebo.
Tiali goli, te bidi dabe augwali isibe.
Augwali augwa isabo bomai sę elama
gegebo sę tiwai ebo da,
bidigo mone tǫ dogolama gegebo tiwai dao. b
22Augwali dwagi yai homu ebo da, augwali te isilama,
augwali gų pageba pubaligi pabode ebo.
23Godigo te tobage bidi dabego sunumi me
sina sabo dao,
te augwali te obo tomode elalubo tiwai eyu,
tama te bidi dabe augwali pabo sunumi
meni ebo dao.
Augwaligo magi sę mu yaibawe?
Tama magi baso Godigo augwali bidimainogo ebowe?”
24“Ena nai me tubo meni yani.
Eno haligade gela naga wabo.
Ena dene dwai mu ebaso, ena hwąwa
boma mu wabo dao.
Tama eno homu sęgę da,
ąį gamiade wę pągąlubo tiwai elama pabo tiwai ebo.
25Magi baso meni, te tigidali nai dabe
ena wi mu ebo da,
te nai dabego ena sabolama, ena dolobo dao.
Awe, te ena wi ilali sę dabe enaba pedelai dao.
26Tibaso, eno bugai homu me ebe,
tama ena dua me dulalube,
tama tiyu, ena dua me dualalubeo. Mu menio.
Tigidali sogo eno tigide dwai sęgę naga siyu ebo dao,
tama eno homu tegalugobeo,” Jopgo te po wali.
Copyright information for
MPS